GR og Eimskip vinna saman að forvörnum

Golfklúbbur Reykjavíkur og Eimskip hafa undirritað samstarfssamning til næstu þriggja ára sem felur í sér fjölbreytt samstarf félaganna á ýmsum sviðum, fyrst og fremst á sviði forvarnarmála en einnig hvað varðar almenna framþróun golfíþróttarinnar á Íslandi.

Garðar Eyland, framkvæmdastjóri GR, segir að mikil ánægja ríki innan klúbbsins með samninginn sem sé því afar mikilvægur. „Það skiptir mjög miklu máli að fá slíkan stuðning og gerir okkur kleift að halda áfram að efla og bæta okkar starf í þágu hinna fjölmörgu golfiðkenda félagsins," segir Garðar. Golfklúbburinn er sá fjölmennasti hér á landi og telur um þrjú þúsund félagsmenn, að því er fram kemur í tilkynningu.

„Við erum mjög ánægð með samstarfssamningin við GR. Við leggjum mikla áherslu á forvarnar- og unglingastarf sem er mjög mikilvægt fyrir ungu kynslóðina og raunar allar fjölskyldur í landinu. Golfíþróttin er mikil fjölskylduíþrótt og hefur notið sívaxandi vinsælda á undanförnum árum. Við erum stolt og ánægð að tengjast þessari skemmtilegu íþrótt," segir Gylfi Sigfússon, forstjóri Eimskips.

Eimskip hefur verið aðalstyrktaraðili Golfsambands Íslands undanfarin ár og segist Gylfi líta svo á að þetta sé eðlilegt framhald af því farsæla samstarfi.

Myndatexti: Ólafur Hand, forstöðumaður kynningar- og markaðsmála hjá Eimskip, Gylfi Sigfússon, forstjóri Eimskips, Garðar Eyland, framkvæmdastjóri GR, og Ómar Örn Friðriksson, markaðsstjóri GR, við undirritun samstarfssamningsins.