Er að vinna fyrir sérstakan saksóknara

Stefán Svavarsson var innri endurskoðandi Seðlabanka Íslands um þriggja ára skeið. Hann lét af störfum árið 2008. Hann taldi ekki ástæðu til að hafa áhyggjur af eignum bankanna á þeim tíma. Þeir hefðu sýnt góða afkomu, verið með mjög góða eiginfjárstöðu og reikningar þeirra áritaðir af alþjóðlegum endurskoðunarfyrirtækjum, sagði hanní vitnaleiðslum í gær. Í reikningunum hefði auk þess komið fram að þeir væru gerðir í samræmi við alþjóðlega reikniskilastaðla. Ef innviðir eignasafna bankanna hefðu verið slæmir hefði engin leið verið fyrir þann sem las reikninga þeirra að átta sig á því.

Stefán var þá spurður hvort endurskoðun bankanna hefði ekki verið eðlileg. Hann tilkynnti þá úr vitnastúku að hann hefði tekið að sér verkefni fyrir embætti sérstaks saksóknara við að kanna reikninga sem bankarnir birtu á árunum 2007 og 2008. Því fyndist honum ekki við hæfi að svara spurningunni.

Andri Árnason, lögmaður Geirs H. Haarde, tilkynnti þá að hann hefði ekki haft neina hugmynd um þessa vinnu Stefáns og hætti því snögglega að spyrja út í skýrslugjöf hans fyrir rannsóknarnefnd Alþingis. Andri spurði Stefán loks hvort að eitthvað væri í reikningum bankanna sem gæfi Geir tilefni til að draga í efa að innihald þeirra væri rétt. „Menn eiga að geta treyst undirrituðum reikningum. Hitt er svo sjálfstætt rannsóknarefni hvort sú vinna var rétt eins og reglur gera ráð fyrir," sagði Stefán.