„Mildari leiðir stóðu til boða“

„Þetta var í takt við það sem maður hefði búist við,“ segir Páll Harðarson, forstjóri Kauphallarinnar, í gær eftir fyrsta daginn á markaði undir nýjum reglum. „HFF14-flokkurinn lækkaði um 14% og svo var hækkun á lengri endanum. Þetta var nokkurn veginn í takt við væntingar.“

Páll segir að vitað hafi verið að fjárfestar hafi sótt í ákveðinn flokk skuldabréfa til að koma fjármunum úr landi. „Og eins og aðrir vorum við meðvituð um ásókn í þennan flokk bréfa af þessari ástæðu. En þetta er í rauninni ekkert nýtt. Mér finnst þetta ekki hafa kallað á að grípa inn í og breyta forsendum viðskipta sem þegar hafa átt sér stað. Mín skoðun er sú að ýmsar mildari leiðir hafi staðið til boða til að ná tilsettum árangri, til dæmis með því að undanskilja þessa flokka bréfa sem um ræðir. Þarna finnst mér óvarlega farið.“