Annþór Karlsson handtekinn í aðgerðum lögreglunnar í dag

Fimm voru handteknir í umfangsmiklum aðgerðum lögreglunnar í dag vegna rannsóknar á skipulagðri glæpastarfsemi. Einn þeirra er Annþór Karlsson þekktur handrukkari.

Fjölmennt lið lögreglu tók þátt í aðgerðunum. Framkvæmdar voru átta húsleitir, bæði á heimilum og í fyrirtækjum. Þá voru fimm handteknir og eru þeir allir enn í haldi lögreglunnar. Lögregla segir um að ræða rannsókn á skipulagðri glæpastarfsemi. Við húsleitirnar var lagt hald á það sem talið er vera þýfi og fíkniefni. Þá fundust einnig vopn líkt og hnífar. Lögregla segir rannsóknina snúa að líkamsmeiðingum, hótunum, innbrotum og þjófnuðum.

Þeir handteknu voru yfirheyrðir í dag. Samkvæmt heimildum fréttastofu hafa mennirnir unnið innheimtustörf fyrir skipuleg glæpasamtök og eiga nokkrir þeirra langan afbrotaferil að baki. Einn þeirra fékk til að mynda rúmlega sjö ára fangelsisdóm árið 2005 fyrir lífshættulega árás. Þá er Annþór Karlsson þekktur handrukkari einnig meðal þeirra sem voru handteknir í dag. Hann hefur til að hlotið dóma fyrir umfangsmikið fíkniefnasmygl og stórfella líkamsárás.

Lögreglan hefur frest til morguns til að ákveða hvort að farið verði fram á gæsluvarðhald yfir mönnunum.