Hundsa úrskurð ráðuneytisins

Meirihluti bæjarstjórnar Seltjarnarness ákvað í dag að aðhafast ekkert vegna úrskurðar innanríkisráðuneytisins varðandi uppsögn Ólafs Melsted, fyrrverandi framkvæmdastjóra hjá Seltjarnarnesbæ, úr starfi.

Ráðuneytið komst að þeirri niðurstöðu í síðasta mánuði að uppsögn Ólafs með niðurlagningu stöðu hans sem framkvæmdastjóri hafi brotið gegn sveitastjórnarlögum. Þá hafi bæjarstjórn Seltjarnarnesbæjar vanrækt þær skyldur sem hvíli á henni samkvæmt reglugerð um aðgerðir gegn einelti á vinnustað. Vanrækslan hafi falist í því að bæjarstjórnin brást aldrei við ásökunum Ólafs um meint einelti í sinn garð. Bæjarstjórnin hafi jafnframt brotið gegn stjórnsýslulögum þar sem hún vanrækti skyldu sína til að rannsaka málið með sjálfstæðum hætti. Jafnframt hafi Ásgerður Halldórsdóttir bæjarstjóri verið vanhæf til að fjalla um mál Ólafs og taka þátt í meðferð málsins. Hún hafi ekki vikið af fundum þrátt fyrir að henni hafi borið skylda til þess.

Í bókun sem meirihluti sjálfstæðismanna í bæjarstjórn samþykkti á bæjarstjórnarfundi í dag segir að bærinn telji sig hafa fylgt lögum og reglum í hvívetna við niðurlagningu á starfi fyrrverandi framkvæmdastjóra bæjarfélagsins. Ekki verði því frekar aðhafast að svo stöddu vegna nýgengins úrskurðar innanríkisráðuneytisins.

Jóhann Hafstein, lögmaður Ólafs, furðar sig á viðbrögðum bæjarstjórnarinnar við úrskurði innanríkisráðuneytisins. Hann bendir á að í fyrra hafi dómskvaddir matsmenn, sálfræðingar, úrskurðað að Ólafur Melsted hafi liðið einelti í starfi sínu. Bæjarstjórnin hafi ákveðið að bregðast ekkert við því. Þá hafi Persónuvernd jafnframt komist að því að Ásgerður Halldórsdóttir bæjarstjóri hafi brotið gegn Ólafi.

„Nú blasir því við að höfða þarf mál á hendur Seltjarnarnesbæ, bæði vegna þess tjóns sem Ólafur hefur orðið fyrir sökum eineltis á vinnustað og einnig vegna ólögmætrar niðurlagningu stöðu hans sem framkvæmdastjóri hjá sveitarfélaginu," segir Jóhann Hafstein, lögmaður Ólafs.