Bann við lausafjárgöngu myndi kippa stoðunum undan búskap

Umhverfisráðherra vill banna lausagöngu búfjár hér á landi. Formaður landssamtaka sauðfjárbænda segir slík bannið geta kippt stoðunum undan sauðfjárbúskap víða.

Í grein sinni í Bændablaðinu í dag segist Svandís Svavarsdóttir umhverfisráðherra vilja banna lausagöngu búfjár en jafnframt að ákvæði verði sett um heimildir til að veita undanþágur frá því banni. Í dag er þessu öfugu farið, lausaganga er leyfð en heimildir eru til að banna hana á afmörkuðum svæðum. Forsvarsmönnum sauðfjárbænda hugnast hugmyndir ráðherra afar illa er fram kemur í Bændablaðinu þar á meðal Þórarni Péturssyni, formanni Landssamtaka sauðfjárbænda.

Þórarinn segir að pistill Svandísar hafi komið sér á óvart þar sem sérstök nefnd vinni nú við að fara yfir beitastjórnun og sjálfbæra landnýtingu en hún á að skila tillögum eftir mánuð. Þá gefur hann lítið fyrir undanþáguna frá banninu sem umhverfissráðherra leggur til. „Við vitum það þegar undanþágur eru notaðar það gengur stundum illa að fá þær. Sum svæði eru minna gróin en önnur," segir hann.

Þá bendir Þórarinn á að svæði séu mis vel gróin og að bændur hafi unnið landgræðslustarf á minna grónum svæðum til að geta nýtt þau til beitar. Hann telur að sérstaklega erfitt verði að fá undanþágu fyrir þau svæði. Þá hefur hann áhyggjur af verkefninu bændur græða landið.

Bændur hafa verið mjög viljugir við að stunda landgræðslu gegn því að menn fái að nýta svæðin í staðinn. þessi svæði hafa sýnt mikla framför eftir að þetta verkefni byrjaði og búið að græða alveg gríðarlegt flæmi af landi," bætir hann við.

Svandís Svavarsdóttir er ekki ánægð með viðbrögð bænda. „Mér þykja þessi viðbrögð harðari en efni standa til. Það virðist ekki vera ágreiningur við talsmenn bænda í því að nauðsynlegt sé að tryggja sjálfbæra landnýtingu. Á stórum svæðum víða um land hefði þetta ekki í för með sér miklar breytingar, eins og á suðvesturhorninu þar sem vörsluskyldufyrirkomulagi hefur verið komið á af sveitarfélögum í samstarfi við bændur, eða á þeim svæðum þar sem ofbeit er ekki vandamál. Á móti eru mörg svæði þar sem sannarlega þarf að grípa til aðgerða til að sporna við ofbeit, þar ættum við að geta verið samtaka um að verja landið. Þessi mál eru til skoðunar í nefnd um beitarstjórnun og sjálfbæra landnýtingu, sem ég bind vonir við að skili tillögum sem hægt verði að nota við áframhaldandi vinnu í átt að sátt um sjálfbæra landnýtingu," segir Svandís.