Í dýrð haustlita

Að hugsa sér að eiga slíkt land sem Íslendingar eiga og geta gengið áreitnislaust út á árbakkann til að horfa á það undur veraldar sem ísaldarurriðinn er," segir Ólafur Örn Haraldsson, þjóðgarðsvörður á Þingvöllum, nýkominn úr göngu niður Almannagjá með forseta Alþjóðaknattspyrnusambandsins (FIFA) og forystumönnum KSÍ.

"Í göngutúrnum stönsuðum við á álunum við Öxará og sáum þó nokkra gríðarstóra urriða á leið upp ána og að fossinum þar sem þeir takast á um hrygningar í frjóvgunarferlinu. Það var magnað sjónarspil og Þingvellir í glæsilegum búningi," segir Ólafur snortinn af fegurð og lífríki helgasta lands Íslendinga.

"Það er óvíða fegurra en á Þingvöllum á haustin. Litskrúð haustdýrðarinnar er þó komið yfir hámark sitt og rauði liturinn að mestu horfinn. Yfirbragðið er engu að síður töfrandi í gulum og brúnum litatónum," segir Ólafur og horfir í átt til formfagurra Botnssúlna, Ármannsfells og Hrafnabjarga sem nú hafa gránað niður í rætur og skarta fannhvítu sjali.

"Þingvallaferðir þurfa síst að líða undir lok þótt sumri hafi hallað. Hitastigið fer þó kólnandi og gott að vera vel búinn. Hér er margt að sjá og fegurðin yndisleg," upplýsir Ólafur.

Hann segir framlag þjóðgarðsins í verkefninu "Ísland allt árið vera opnun fræðslumiðstöðvarinnar í allan vetur, en hún er opin daglega frá klukkan 9 til 17.

"Þar er hægt að hlýja sér, komast á salerni, fá sér kaffisopa og skoða fallegar bækur. Þaðan er svo ævintýri að ganga niður nýju brautina í Almannagjá sem er að mestu leyti frágengin eftir að glufa opnaðist í gjánni vorið 2011," segir Ólafur.

Frá Reykjavík er um 35 mínútna akstur til Þingvalla og margt sem gleður augað á leiðinni.

"Til Þingvalla er endurnærandi að koma, í friðinn og kyrrðina sem einkennir Ísland. Ferðamenn eru fáir á þessum árstíma. Því þarf ekki að ganga mörg skref til að verða einn í heiminum og vitni að undurfögrum haustblæ sem setur svip á landið þegar það býr sig undir vetrarsvefninn."