Ekki bara vínhérað

Bordeaux er nafn sem margir hafa heyrt og kannast við enda eru milljónir vínflaskna merktar þessu franska héraði. Það vill þó oft gleymast að Bordeaux er líka nafn á borg í suðvesturhluta Frakklands sem er spennandi áfangastaður fyrir ferðalanga.

Borgin og nágrenni hennar eru full af sögulegum og menningarlegum minjum, svo sem kastölum, kirkjum og styttum. Svæðið hefur upp á margt að bjóða og flestir ættu að geta fundið eitthvað við sitt hæfi.

Fyrir vínáhugamenn ætti það að vera mikil upplifun að koma til þessa þekkta héraðs þar sem ársframleiðsla er um það bil 960 milljón vínflöskur frá tugum þúsunda framleiðenda. Landslagið er fallegt og tilvalið að hjóla um sveitir héraðsins. Þannig má kanna öll litlu þorpin, hitta íbúana og upplifa menninguna.

Kastalar eru á hverju strái þannig að engu er líkara en að fólk sé statt í ævintýri. Margir kastalanna eru á vínekrum og eru opnir almenningi sem getur þá fengið leiðsögn um vínræktarsvæðið og framleiðsluferlið. Jafnvel er boðið upp á vínsmökkun.

Bordeaux er merkileg borg fyrir margar sakir. Hún er ein af elstu borgum Frakklands og fræg fyrir arkitektúr sinn. Borgin er skráð á heimsminjaskrá UNESCO og í henni eru skráð 362 söguleg minnismerki og elstu byggingar hennar eru frá tímum Rómverja.

Auk alls þessa er ágætt að versla í borginni. Í hjarta hennar er Rue Sainte-Catherine sem er 1,2 kílómetra löng göngugata full af verslunum, veitingastöðum og kaffihúsum.

Frakkar eru einmitt þekktir fyrir matargerð sína og má njóta hennar á fjölmörgum veitingastöðum borgarinnar. Ostrur, "foie gras", alls konar paté ásamt glasi af léttvíni úr héraðinu er uppskrift að góðum, frönskum málsverði.