Lyfjameðferðin kostar 40 milljónir á ári

Ungur maður byrjar á árinu í lyfjameðferð á Landspítalanum sem kostar um fjörtíu milljónir á ári. Um er að ræða dýrustu einstöku lyfjameðferð sem að spítalinn hefur veitt. Óttast er að skera þurfi niður lyfjameðferðir vegna kostnaðar.

Kostnaður ríkissins vegna sérhæfðralyfja hefur farið vaxandi síðustu ár. Lyfin sem um ræðir eru kölluð S-lyf og eru til að mynda notuð við slæmum gigtarsjúkdómum, krónískum sjúkdómum og krabbameini.

Í fjárlögum er gert ráð fyrir að útgjöld ríkisins aukist um tæpan milljarð á milli áranna 2011 og 2012 vegna lyfjanna. Þannig kostuðu lyfin á síðata ári um 4,5 milljarða en gert ráð fyrir að lyfin kosti ríkið í ár 5,3 milljarða.

„Það hafa komið fram þessi öflugu líftæknilyf á undanförnum árum sem að eru í senn mjög virk gegn sjúkdómum en eru líka mjög kostnaðarsöm. Við höfum þurft að feta þennan stíg á milli þess að veita bestu meðferð annars vegar og hins vegar að gæta þess að spítalinn sé innan ramma fjárlaga," segir Ólafur Baldursson, framkvæmdastjóri lækninga á Landspítalanum.

Kostnaður við einstakar lyfjameðferðir getur verið mjög hár. Til að mynda sér spítalinn frammá að hefja á árinu dýrustu lyfjameðferðina sem boðið hefur verið upp. Hún kostar um fjörtíu milljónir á ári. Um er að ræða meðferð við mjög sjaldgæfum sjúkdómi sem hrjáir fáa Íslendinga. Einn af þeim sem fær lyfjameðferðina er ungur maður sem þarf að öllum líkindum á henni að halda ævilangt.

„Mörg þessarra lyfja lækna ekki fullkomlega, því miður. Það þýðir það að þau halda sjúkdóminum niðri og þá þarf að halda meðferð áfram. Það er oft um ræða sjúklinga á miðjum aldri og þeir halda meðferðinni áfram svo árum skiptir, sem betur fer. En út frá kostnaði þá bætist sem sagt alltaf við," segir Ólafur.

Óttast er að skera þurfi að skera niður lyfjameðferðir vegna kostnaðar og jafnvel að svo fari að hætta þurfi einhverjum meðferðum á spítalanum.

„Eftir því sem að tíminn líður þá munum við þurfa að fara í meiri og meiri forgangsröðun. Það er svolítið snúið núna ekki síst vegna þess að það er ekki eitthvað sem við getum gert ein hér á spítalanum. Við þurfum nána samvinnu við yfirvöld og að sjálfsögðu þá sem eru eigendur starfseminnar sem er að sjálfsögðu almenningur," segir Ólafur að lokum.