Bílstjórinn sem taldi vitlaust miður sín

„Að sjálfsögðu er þetta óheppilegt mál en bílstjórinn gerði þetta rétt og stóð sig vel. En mannleg mistök geta átt sér stað," sagði Kristján Daníelsson, framkvæmdastjóri Kynnisferða, í viðtali við Reykjavík síðdegis á Bylgjunni í dag, en bílstjóri hjá fyrirtækinu taldi vitlaust ferðamenn sem voru að ferðast með rútunni með þeim afleiðingum að hátt í 50 einstaklingar voru kallaðir út til þess að leita að konunni á laugardaginn síðasta.

Það var skömmu eftir hádegi á laugardaginn sem að bílstjóri áætlunarbifreiðar tilkynnti lögreglu að útlend kona, sem verið hafði á ferð með honum, væri saknað. Hann taldi að konan hefði ekki skilað sér aftur í rútuna eftir að hafa farið úr henni við Eldgjá sem er skammt frá Skaftafelli. Leit var strax hafinn að konunni og björgunarsveitir kallaðar til.

Óskað var eftir aðstoð Landhelgisgæslunnar en vegna veðurs var ekki hægt að senda þyrlu á svæðið. Þegar ekkert hafði sést til konunnar um klukkan þrjú aðfaranótt sunnudags var farið að skoða málið betur.

Kom þá í ljós að konan hafði aldrei verið týnd. Og það sem meira var, hún aðstoðaði við leitina að sér sjálfri. Konan hafði farið úr jakka og tekið af sér sjal á meðan hún brá sér úr rútunni við Eldgjá. Bílstjórinn þekkti hana ekki þegar hún kom til baka og taldi því að hún hefði ekki skilað sér aftur í rútuna og væri týnd.

Kristján segir að það sé betra að leita að manneskju sem er ekki týnd heldur en að sleppa því að leita að manneskju sem er sannarlega villt.

Spurður hvort hann hafi rætt sjálfur við bílstjórann svaraði Kristján að hann hefði ekki gert það. „Ég er ekki búinn að tala við hann, en skilst að hann sé miður sín yfir þessu. Þetta er góður og vanur starfsmaður sem hefur unnið lengi hjá okkur."

Kristján bætti svo við: „Hann telur eflaust tvisvar næst."

Kristján er mjög þakklátur þeim sem komu að leitinni á frídegi sínu og segir að fyrirtækið muni fara yfir alla verkferla í svona aðstæðum til þess að tryggja að svona mistök endurtaki sig ekki.

Hægt er að hlusta á viðtalið við Kristján í viðhengi hér fyrir ofan.