Råsunda kvaddur með söknuði

Svíar töpuðu 3-0 gegn Brasilíu í gærkvöldi í síðasta landsleiknum sem fram fer á þjóðarleikvanginum Råsunda. Leikvanginn á að rífa og byggja nýjan í um eins kílómetra fjarlægð.

Svíar töpuðu einnig fyrsta landsleiknum sem fram fór á leikvanginum árið 1937 þegar England vann stórsigur 4-0. Þeir sænsku geta þó huggað sig við það að síðasti alvöru landsleikurinn var 3-2 sigurinn á Hollandi í undankeppni EM 2012 sem tryggði Svíum sæti í lokakeppninni.

„Þó svo að leikvangurinn verði rifinn mun nafnið Råsunda aldrei deyja," sagði brasilíska goðsögnin Pele sem á sterkari minningar en margir frá leikvanginum. Það var á Råsunda sem hinn 17 ára Edon Arantes do Nascimento (nú Pele) og félagar hans í brasilíska landsliðinu tryggðu sér heimsmeistaratitilinn árið 1958 með 5-2 sigri á Svíum. Pele skoraði tvívegis í leiknum.

AIK, félag Helga Vals Daníelssonar sem spilar heimaleiki sína á vellinum, spilar á vellinum til 4. nóvember. Þá mætir liðið Malmö en liðin mættust einmitt í fyrsta leiknum sem fram fór á vellinum 1937.

Råsunda er eini leikvangurinn í heiminum ásamt Rose Bowl í Pasadena í Bandaríkjunum þar sem úrslitaleikur heimsmeistaramótsins í knattspyrnu í karla- og kvennaflokki hafa verið spilaðir.