Defoe tileinkaði látinni frænku sinni markið

Jermain Defoe tryggði Englendingum 2-1 sigur á Ítölum með stórglæsilegu langskoti í æfingaleik þjóðanna í Bern í Sviss í gærkvöldi.

Defoe, sem hafði ekki skorað fyrir enska landsliðið síðan hann skoraði þrennu gegn Búlgaríu í september 2010, hamraði boltann efst í markhornið þegar ellefu mínútur lifðu leiks.

England hafði ekki lagt Ítalíu að velli í 15 ár og Defoe notaði tækifærið og tileinkaði heitinni frænku sinni markið.

„Þetta mark var fyrir frænku mína. Hún hefði orðið 21 árs í dag. Þetta er eitt glæsilegasta mark sem ég hef skorað fyrir England," sagði Defoe. Frænka hans, Hannah, lét lífið í slysi í síðasta mánuði í sumarleyfi á Sankti Lúsíu-eyju í karabíska hafinu.

Mark Defoe má sjá í spilaranum hér fyrir ofan.