Alfreð: Draumur að spila fyrir Van Basten

"Svona er boltinn. Hlutirnir eru fljótir að breytast," sagði Alfreð Finnbogason við Vísi en hann samdi óvænt við hollenska félagið Heerenveen í kvöld en fyrr í vikunni var hann á leið til sænska félagsins Helsingborg.

Samningar náðust ekki á milli Helsingborgar og félags Alfreðs, Lokeren, en Heerenveen náði fljótt samningum við Lokeren og eftir það gerðust hlutirnir hratt.

"Það var ekki hægt að neita þessu þegar það kom upp. Menn sem eru að standa sig hér eru seldir til Wolfsburg, PSV Eindhoven og svo var einn seldur til Liverpool í dag.

"Að fá tækifæri til að spila fyrir þennan klúbb og Van Basten sem þjálfara er draumur. Það eru 26 þúsund manns á öllum leikjum hérna og þetta er magnað," sagði Alfreð en þjálfari liðsins er hollenska goðsögnin Marco van Basten sem ætti að geta kennt Alfreð ýmislegt um það hvernig á að skora mörk.

"Ég er gríðarlega ánægður með þessa lendingu. Ég fór aðeins brenndur frá Belgíu til Svíþjóðar og setti mér það markmið að standa mig þar og komast til Hollands. Þegar slíkt gengur eftir er maður gríðarlega sáttur."

Alfreð verður líklega í byrjunarliði Heerenveen um helgina er liðið sækir Feyenoord heim.