Dundee United á toppnum í Skotlandi

Dundee United skellti nágrönum sínum í Dundee 3-0 á heimavelli sínum í skosku úrvalsdeildinni í dag. Mörkin komu öll í fyrri hálfleik en Dundee United er eina liðið með fullt hús stiga í deildinni.

Írinn Gavin Gunning skoraði fyrsta markið á 14. mínútu. Johnny Russell bætti tveimur mörkum við á 35. og 38. mínútu og gerði út um leikinn. Russell fékk svo að líta rauða spjaldið þegar honum lenti saman við Stephen O´Donnell leikmann Dundee sem einnig var rekinn útaf.

Dundee United hefur aðeins leikið tvo leiki líkt og Celtic sem tapaði óvænt stigum í gær gegn Ross County en önnur lið hafa leikið þrjá leiki í deildinni. Leik Celtic og Dundee United sem leika átti föstudaginn 10. ágúst var frestað vegna þátttöku Celtic í forkeppni Evrópudeildarinnar.

Búist var við að Celtic fengi enga samkeppni um meistaratitilinn í Skotlandi þar sem Rangers varð gjaldþrota og þarf að vinna sig upp deildarkeppninnar þar í landi en góð byrjun Dundee United og jafntefli Celtic í gær gefur von um að meiri spenna verði í skosku deildinni en fyrirfram talið var.