Dæmdur morðingi og hrotti ákærðir fyrir fjárkúgun og frelsissviptingu

Tveir dæmdir ofbeldismenn hafa verið ákærðir fyrir frelsissviptingu, fjárkúgun og tilraun til ráns þegar þeir neyddu karlmann upp í útibú Íslandsbanka á Stórhöfða í september síðastliðnum í þeim tilgangi að láta hann taka fé út af reikningi sínum. Mennirnir tveir fóru heim til bræðra og ógnuðu þeim meðal annars með vasahníf. Mennirnir hótuðu öðrum manninum ofbeldi og kröfðust þess að hann afhenti þeim hálfa milljón króna.

Því næst fór annar maðurinn með annan bróðurinn í Íslandsbanka á meðan hinir biðu í íbúðinni. Í bankanum tókst fórnarlambinu hinsvegar að gefa gjaldkera merki með þeim afleiðingum að lögreglan var kölluð til. Voru mennirnir þá handteknir og úrskurðaðir í gæsluvarðhald eins og Vísir greindi frá síðasta haust.

Mennirnir eru einnig ákærðir fyrir fíkniefnalagabrot, líkamsárás og gripdeild.

Báðir hinna ákærðu eiga sér sögu ofbeldisbrota. Annar þeirra hlaut sextán ára óskilorðsbundið fangelsi árið 2000 fyrir að bana áttræðri konu í íbúð hennar við Espigerði. Í niðurstöðum geðheilbrigðisrannsóknar sem lagðar voru fram í málinu á þeim tíma kom fram að maðurinn væri mjög hættulegur undir áhrifum eiturlyfja og hefði verið í mikilli neyslu frá fimmtán ára aldri.

Hinn maðurinn var árið 2007 dæmdur í fjögurra ára fangelsi fyrir hrottafengnar líkamsárásir, en hann í félagi við annan, réðst á mann á Akureyri með grófu ofbeldi. Maðurinn var meðal annars dæmdur fyrir að klippa fingur vinstri handar af fórnarlambinu með greinaklippum. Þá var maðurinn í sama máli dæmdur fyrir grófa líkamsárás fyrir að ráðast á konu sem ók leigubíl og berja hana ítrekað í höfuðið.

Mál tvímenninganna verður þingfest í Héraðsdómi Reykjavíkur á fimmtudaginn.