Íslensk mynd af brjóstagjöf hermanna veldur fjaðrafoki

Brynja Sigurðardóttir, íslenskur ljósmyndari, hefur sett allt á hvolf í Bandaríkjunum með því að taka mynd af tveimur konum í herbúningi gefa barni brjóst. Margir telja brjóstagjöfina vanvirðingu við herbúninginn.

Myndin vakti reiði fjölda fólks og hrifningu annarra og kom af stað athugasemdaflóði á internetinu. Í fjaðrafokinu og æsingnum hrundi vefsíða Brynju. Á facebook-síðu sinni kom hún aftur á móti þeim skilaboðum á framfæri að hún hafi hvorki ætlað að valda uppþoti né vekja athygli með myndinni.

Skoðanir á myndinni eru mjög skiptar. Einhverjir telja brjóstagjöf í herklæðum fullkomlega eðlilega. „Þetta er bara mannleg náttúra. Þetta er það sem við vorum sköpuð til að gera."

Aðrir telja myndina algera vanvirðingu. Herinn í Washington (The Washington National Guard) hefur fordæmt myndina og sagt rangt af konunum að láta mynda sig. Sömuleiðis hefur flugherinn í Washington (Fairchild Air Force Base) lýst vanþóknun sinni á myndinni.