Þjálfari Lilleström líkir Birni Bergmann við Zlatan Ibrahimovic

Björn Bergmann Sigurðarson, leikmaður norska úrvalsdeildarliðsins Lilleström, fær mikið hrós frá þjálfara sínum eftir leik liðsins gegn Vålerenga í gærkvöld. Magnus Haslun, þjálfari Björns, gengur svo svo langt að líkja Skagamanninum við sænsku stórstjörnuna Zlatan Ibrahimovic sem leikur með AC Milan á Ítalíu. Leikurinn endaði 1-1.

Haslun, er sænskur, og á blaðamannafundi eftir leikinn útskýrði hann hvað væri sameiginlegt með hinum 21 árs gamla íslenska framherja og Zlatan. „Þegar Zlatan var á sama aldri var hann með mikla líkamlega yfirburði líkt og Björn. Hann er fljótur, sterkur og með góða tækni. Hann er einnig jafnvígur á báða fætur og góður skotmaður," sagði Haglund m.a. í gær.

Martin Andresen þjálfari Vålerenga gefur Birni einnig góð meðmæli. „Hann er góður leikmaður, sterkur, fljótur og góður skallamaður. Hann er með allt sem til þarf," sagði Andersen við Verdens Gang í gær. Kristofer Hæstad leikmaður Vålerenga sagði einnig við VG að hann ætti ekki von á því að Björn myndi staldra lengi við í norsku úrvalsdeildinni.

Björn hefur verið orðaður við fjölmörg félög á undanförnum mánuðum en samningur hans við Lilleström rennur út í lok ársins 2013.