Segulmagnað húðflúr titrar þegar símtal berst

Finnski snjallsímaframleiðandinn Nokia hefur sótt um einkaleyfi á heldur óvanalegri nýjung. Leyfið tekur til nýrrar tækni sem sendir skilaboð úr snjallsíma í sérstakt húðflúr sem notandinn er með.

Tæknin byggir á segulmögnuðu málmgrýti sem tattóverað er á einstaklinga. Snjallsíminn sendir síðan skilaboð í málmgrýtið sem titrar þegar símtal berst eða rafhlaðan er að tæmast.

Samkvæmt einkaleyfisumsókninni er hægt að hundsa skilaboðin með því strjúka yfir húðflúrið.

Notendur þyrftu að gangast undir smávægilega skurðagerð til að fá húðflúrið. Það verður þó hægt að notast við tæknina án þess að gangast undir aðgerðina - endingartími málmgrýtisins verður þó margfalt styttri fyrir vikið.

Samkvæmt Nokia býður tæknin upp á ýmsa möguleika. Grýtið gæti titrað á ýmsa vegu og komið þannig mismunandi skilaboðum á framfæri.