Eitt fallegasta málverk Leonardo da Vinci opinberað á ný

Síðustu 18 mánuði hafa listfræðingar unnið að viðgerð eins frægasta málverks Leonardo da Vinci. Verkið var loks opinberað í Louvre safninu í París í dag við mikinn fögnuð listunnenda.

Da Vinci vann að verkinu í 20 ár og var óklárað þegar hann lést árið 1519. Það ber heitið The Virgin and Child with Saint Anne og er af mörgum talið eitt áhrifamesta listaverk síns tíma.

Listfræðingar hafa unnið að hreinsun málverksins síðustu mánuði og er afraksturinn sagður vera magnaður.

„Þetta er ótrúlegt - svo ótrúlega fallegt," sagði listunnandinn Odile Celier. „Maður fær sömu tilfinningu og þegar gengið er inn í Sixtínsku kapelluna... Sjáiði bara bláa litinn."

Á sýningunni er rúmlega 130 teikningar og drög að málverkum eftir da Vinci. Vincent Delieuvin, safnvörður í Louvre, telur að sýningin varpi áhugaverðu ljósi á sköpunarferli da Vinci.