Áfram stormur á Norður- og Austurlandi

Það var enn mjög hvasst klukkan sex í morgun en þá var suðvestan átt og víða fimmtán til 25 metrar á sekúndu.

Vindurinn var hvað verstur Norðan og Austan lands. Það var hlýtt á landinu öllu snemma í morgun, en hitinn var frá núll gráðum upp í sjö.

Það er þó gert ráð fyrir því að það kólni eftir því sem veður lægir. Búist er við áframhaldandi stormi á Norður og Austurlandi framan af degi en samkvæmt upplýsingum veðurspár verður meðalvindur um 20 metrar á sekúndu.

Engar fréttir hafa borist af skemmdum vegna stormsins í nótt. Rafmagn fór af Saurbæjalínu í Dalabyggð um klukkan sjö í morgun, en truflanir hafa verið á línunni frá því snemma í morgun. Vinnuflokkur Rarik í Búðardal hefur verið ræstur út til bilanaleitar og viðgerðar. Annars hefur verið lítið að gera hjá lögregluembættum landsins vegna veðurs.