Vörukarfa ASÍ hefur hækkað mest í Bónus - minnst í Hagkaup

ASÍ hefur tekið saman verðbreytingar á vörukörfu sinni frá því í apríl 2008 til byrjun mars á þessu ári. Í ljós kemur að vörukarfan hefur hækkað meira í lágvöruverðsverslunum en í öðrum. Mesta hækkunin er í Bónus, um 55 prósent en minnst er hún í Hagkaup þar sem hækkunin nemur 21 prósenti.

„Til hliðsjónar má benda á að verð á mat- og drykkjarvörum í vísitölu neysluverðs hefur hækkað um 38% frá því í apríl 2008 þar til nú í febrúar," segir í tilkynningu frá ASÍ. „Þegar rýnt er í verðhækkanir verslunarkeðjanna á þessum fjórum árum má sjá að þær eru mjög mismunandi eftir verslunarkeðjum. Minnsta hækkunin á þessu tímabili er hjá verslunum Hagkaupa um 21% og Nóatúns um 23%. Mesta hækkun á þessu tímabili er hjá Bónus um 55%, Samkaupum-Strax um 53%, Nettó um 50%, 11/11 um 48% og Krónunni um 46%."

Þá er þess getið að verðlagseftirlitið mælir breytingar á verði vörukörfu sem getur endurspeglað almenn innkaup meðalheimilis. „Vörukarfa ASÍ inniheldur allar almennar mat- og drykkjarvörur, t.d. brauðmeti, morgunkorn, pasta, kjöt, fisk, grænmeti, ávexti, pakkavörur, kaffi, gos, safa, auk hreinlætis- og snyrtivara. Við samsetningu vörukörfunnar voru hafðar til hliðsjónar vogir Hagstofunnar sem notaðar eru til útreiknings á vísitölu neysluverðs."

ASÍ segir að vogir Hagstofunnar segi til um hversu stór hluti tilteknir vöruflokkar séu af neyslukörfu meðalheimilis. „Verðbreytingar eru skoðaðar í eftirfarandi verslanakeðjum: Í lágvöruverðsverslunum Bónus, Krónunni og Nettó og í almennu matvöruverslununum Hagkaupum, Nóatúni og Samkaupum-Úrval og klukkubúðunum, 10-11, 11-11 og Samkaupum-Strax."

„Þess ber að geta að hér eru einungis birtar upplýsingar um verðbreytingar í verslanakeðjunum á milli verðmælinga. Ekki er því um beinan verðsamanburð að ræða þ.e.a.s. hvar ódýrustu vörukörfuna var að finna. Einnig er rétt að athuga að skoðuð eru þau verð sem eru í gildi í verslununum á hverjum tíma og geta tilboð á einstaka vöruliðum því haft áhrif á niðurstöðurnar."