Japanskir skiptinemar minntust hamfara á Háskólatorgi

Japanskir skiptinemar og nemendur við Háskóla Íslands minntust hamfaranna í Japan á Háskólatorgi í dag. Þeir segja Japani vera mjög þakkláta Íslendingum fyrir stuðning og samúð eftir að jarðskjálftinn reið yfir. Jóhanna Margrét Gísladóttir.

Í gær, ellefta mars, var ár liðið síðan að gríðarlega öflugur jarðskjálfti og flóðbylgja varð um tuttugu þúsund manns að bana og olli miklu tjóni í Japan. Kjarnorkuver í Fukushima stórskemmdist í skjálftanum og margir íbúar á svæðinu óttast enn geislunina sem varð í kjölfarið, til dæmis þora börn ekki að leika sér á götum úti.

Japanskir skiptinemar við Háskóla Íslands ákváðu að minnast hamfaranna með athöfn á Háskólatorgi í dag. Söngkonan Sóley flutti nokkur lög og héldu nemarnir ræður til að minnast fórnarlambanna. Í kvöld klukkan átta verður síðan kertafleyting á Tjörninni.

Þá höfðu nemendur við japönsku í háskólanum föndrað þúsund japanska pappírsfugla sem sendir verða á hamfarasvæðið en þeir eru japanskt ták fyrir von.

Toshiki Toma, prestur innflytjenda, segir Japani vera þakkláta fyrir stuðning Íslendinga í kjölfar skjálftans til dæmis með söfnun á ullarfatnaði. Þá séu svona athafnir eins og í dag mikilvægar svo fólk gleymi ekki atburðinum.