Fæðingum fækkaði nokkuð í fyrra miðað við árið á undan

Fæðingum á árinu 2011 fækkaði örlítið ef miðað er við árið á undan. Á síðasta ári fæddust 4.496 börn en árið á undan voru börnin 4.907. Fæðingartalan í fyrra er þó svipuð og meðaltal undanfarinna áratuga og er 2011 árgangurinn í 26. sæti miðað við stærð ef litið er allt aftur til ársins 1951, að því er fram kemur í frétt hjá Hagstofunni.

Fleiri drengir en stúlkur fæddust þetta árið, 2.327 á móti 2.169 stúlkum. Það fæddust því 1.078 drengir á móti hverjum 1.000 stúlkum árið 2011.

Fæðingartíðnin, þ.e. fjöldi fæðinga á hverjar 1.000 konur á aldrinum 20-44 ára, var 68 árið 2011, samanborið við 73,7 árið á undan.

Flest voru börnin með lögheimili í Reykjavík, eins og gefur að skilja, 1.718, í Kópavogi 491 og í Hafnarfirði 413. Flest börnin fæddust í ágúst mánuði 428 og júlí 405 en fæst í október 336. Árið 2010 fæddust flestir í september 472 en fæstir í febrúar 372.