Allt stopp á borgarstjóraveggnum - Davíð síðastur upp

„Það er enginn í meirihlutanum sem er alveg miður sín vegna þess að þetta er ekki komið á hreint," segir Björn Blöndal, aðstoðarmaður borgarstjóra, um þá ákvörðun að hætt hefur verið að gera brjóstmyndir af borgarstjórum Reykjavíkurborgar - í bili að minnsta kosti.

Eftir að nýr meirihluti tók við hefur engu fjármagni verið veitt í að gera þessar styttur af borgarstjórunum en síðasti borgarstjóri sem fékk brjóstmynd af sér er Davíð Oddson. Síðan þá hafa verið tíu borgarstjórar í Reykjavík. Hefð hefur verið fyrir því að gera brjóstmynd af öllum borgarstjórum í Reykjavík.

„Það var verið að gera styttu af Markúsi Erni, það er það síðasta sem fór í vinnslu," segir Björn en styttan af honum er ókláruð og verður ekki lokið við hana fyrr fjármagn fæst til þess. „Við ákveðum þetta örugglega áður en kjörtímabilið er úti. Það er pottþétt ekki verið að fara gera eitthvað í þessu í ár," segir hann.

Eins og áður segir er Davíð Oddsson síðasti borgarstjóri sem gerð var brjóstmynd af. Það verður því einhver bið á því þar til verkið af Markúsi Erni verður klárað ef það verður klárað á annað borð.