Ekki með í Drekaútboði - vill ekki pólitíska áhættu

Annað norsku olíufélaganna, sem tóku þátt í fyrsta olíuleitarútboði Íslands fyrir þremur árum, hefur lýst því yfir að það ætli ekki að taka þátt í öðru Drekaútboðinu, sem nú stendur yfir. Það segist ætla að einbeita sér að Noregi og ekki vilja taka pólitíska og viðskiptalega áhættu í landgrunni annars ríkis.

Þegar tilboð voru opnuð í fyrsta olíuleitarútboði Íslands vorið 2009 reyndust tvær umsóknir hafa borist frá norskum félögum um sérleyfi. Önnur var frá Aker Exploration og hin frá Sagex Petrolium. Bæði hafa þau nú sameinast öðrum. Aker Exploration sameinaðist Det norske Oljeselskap og Sagex Petroleum rann inn í breska félagið Valiant Petrolium.

Norski vefmiðillinn E 24 hefur í fréttaröð að undanförnu fjallað um olíuútboð Íslendinga og fékk það svar frá forstjóra Det Norske, sem tók við af Aker Exploration, að það hygðist ekki leggja inn umsókn í útboði Íslands númer tvö, en umsóknarfrestur rennur út þann 2. apríl næstkomandi. Ástæðan sem forstjórinn gefur upp í viðtalinu, sem sjá má hér, er sú að stefna félagsins byggist á því að vera á norska landgrunninu.

„Við erum ekki tilbúnir að taka þá pólitísku og viðskiptalegu áhættu að vera í landgrunni annars ríkis," segir forstjórinn, Erik Haugane. Hann segir fyrirtækið engu að síður áhugasamt um að leita olíu umhverfis Jan Mayen.

Norski fjölmiðillinn spurði einnig talsmann Statoil um Drekaútboð Íslands en fékk þau svör að Statoil myndi hvorki tjá sig um hvort það teldi svæðið áhugavert né hvort það myndi taka þátt í útboðinu.

Svipað svar fékk Stöð 2 frá Terje Hagevang, sem stýrir nú Noregsdeild Valiant, en hann var áður forstjóri Sagex. Terje sagði það stefnu Valiant að tjá sig ekki fyrirfram um þátttöku í olíuleitarútboðum.

Terje Hagevang, sem er olíujarðfræðingur að mennt, er sá sem einna mestri bjartsýni hefur lýst um möguleika Jan Mayen-svæðisins en fyrir fjórum árum sagði hann á ráðstefnu í Reykjavík að hann teldi það geyma álíka verðmæti í olíu og gasi og Noregshaf.