Samfélagsverðlaun Fréttablaðsins afhent í dag

Ólafur Ragnar Grímsson, forseti Íslands, mun afhenda Samfélagsverðlaun Fréttablaðsins á Hótel Reykjavík Natura klukkan fimm í dag. Þetta er sjöunda árið í röð sem verðlaunin eru afhent. Veitt verða verðlaun í fjórum flokkum auk heiðursverðlauna.

Þau sem eru tilnefnd fyrir flokkinn til atlögu gegn fordómum eru sjónvarpsþátturinn Með okkar augum, Kaffi, kökur og rokk&ról og Sigríður Víðis Jónsdóttir.

Til hvunndagshetju hljóta tilnefningar Pauline McCarthy, Árni Stefán Árnason og Gróa Gunnarsdóttir.

Þau sem hljóta tilnefningar í flokknum frá kynslóð til kynslóðar eru tölvufærninámskeið í umsjón Ásdísar Skúladóttur og Magneu Jóhannsdóttur, Stefán Þorleifsson og Bandalag íslenskra skáta.

Þau sem eru tilnefnd til sjálfra Samfélagsverðlaunanna eru Vinafjölskyldur í Vesturbæ, Dyngjan áfangaheimili og Frú Ragnheiður. Veitt eru peningaverðlaun í þeim flokki, ein milljón króna.