Ekkert bólar á endurútreikningu gengislána

Talið er að enn þurfi að koma fjórtán gengislánamálum í gegnum dómstóla áður en hægt verður að reka smiðshöggið á endurútreikninga gengislána. Ekkert bólar á endurútreikningi láns hjóna sem Hæstiréttur dæmdi fyrir mánuði að mætti ekki setja á afturvirka vexti.

Fyrir fjórum vikum, dæmdi Hæstiréttur að Frjálsa fjárfestingarbankanum hefði verið óheimilt að reikna afturvirka Seðlabankavexti á gengistryggt húsnæðislán hjóna í Vesturbænum. Þar með hófst þriðja óvissutímabilið hjá þeim sem tóku gengistryggð lán á sínum tíma. Fréttastofa kannaði í dag stöðu mála.

Fyrsta skrefið til að létta óvissunni var stigið í síðustu viku þegar Samkeppniseftirlitið heimilaði bönkunum að setjast niður með fulltrúum skuldara - og hafa með sér samráð um viðbrögð við dóminum. Hópurinn hefur fundað tvisvar. Hins vegar er ljóst að bankarnir hyggjast ekki leggjast í viðamikla endurútreikninga enn á ný fyrr en þau dómsmál sem þegar eru komin í ferli eru til lykta leidd. Samkvæmt heimildum fréttastofu telja bankarnir að fjórtán mál þurfi að fara í gegnum dómskerfið áður en hægt verður að leysa úr öllum álitamálum. Þar af eru 2 mál einstaklinga gegn Lýsingu vegna bílalána - og tólf mál vegna fyrirtækja.

Slík málaferli geta tekið marga mánuði - nema frumvarp um flýtimeðferð komist í gegnum þingið. Helgi Hjörvar, formaður efnahags- og viðskiptanefndar, segir frumvarpið nú til umsagnar hjá dómstólaráði - verði hún jákvæð telur hann að flýtimeðferðin geti orðið að lögum strax eftir helgi.

Hvernig sem fer - virðist nokkuð ljóst að gengislánaskuldarar geta ekki vænst þess að fá endanlega vitneskju um hvað þeir skulda fyrir næstu mánaðmót.