Gæti hlotið dauðadóm fyrir fjöldamorð í Afganistan

Bandaríski hermaðurinn sem myrti 16 manns í suðurhluta Afganistan fyrr í vikunni var fluttur úr landinu í dag. Mikil reiði er í Afganistan vegna atviksins og krefjast margir þess að réttað verði yfir manninum þar í landi.

Hermaðurinn er nú í haldi á ótilgreindum stað. Hann myrti 16 manns aðfaranótt sunnudags, þar af níu börn.

Talsmaður herafla Bandaríkjanna í Afganistan sagði AP fréttastofunni að mögulegt sé að maðurinn mæti mæti örlögum sínum í Afganistan. Varnarmálaráðherra Bandaríkjanna, Leon Panetta, sagði að hermaðurinn gæti hlotið dauðadóm fyrir verknaðinn.

Samskipti Bandaríkjanna og Afganistan hafa verið afar stirð síðustu misseri. Það er talið nauðsynlegt fyrir Bandaríkin að meðhöndla mál hermannsins rétt, annars gætu tengsl landanna tveggja endanlega rofnað.

Afganir mótmæltu víða í landinu í síðasta mánuði eftir að nokkrir bandarískir hermenn brenndu nokkur eintök af Kóraninum. Rúmlega 30 manns létust í mótmælunum, þar af sex bandarískir hermenn.