Dæmdur fyrir að stela frá húsfélaginu sínu

Karlmaður var í dag dæmdur í þriggja mánaða skilorðsbundið fangelsi fyrir fjárdrátt þegar hann sat sem gjaldkeri í fjölbýlishúsi í Breiðholti í Reykjavík. Maðurinn dró sér rúma milljón á tímabilinu 23. mars 2010 til 24. nóvember sama ár.

Við meðferð málsins fyrir dómi féll sækjandi málsins frá nokkrum ákæruliðum, upphæðin lækkaði því lítillega og stóð því í 805 þúsund krónum.

Maðurinn, sem er tæplega fimmtugur, játaði brot sín skýlaust. Hann hefur aldrei komist í kast við lögin áður. Maðurinn samþykkti að auki skaðabótakröfu húsfélagsins um að endurgreiða féð sem hann dró sér.

Refsingin er skilorðsbundin og fellur niður eftir tvö ár, haldi maðurinn skilorð.