Fangaverðir óttast um öryggi sitt

Fangaverðir hafa miklar áhyggjur af öryggi sínu og annarra í fangelsunum, nú þegar stefnir í að meðlimum íslenskra glæpagengja fjölgi þar til muna.

Hingað til hafa meðlimir úr erlendum gengjum varið samtímis í sömu fangelsunum og allt gengið stóráfallalaust, en harka milli íslensku gengjanna virðist vera að magnast og það veldur sérstökum áhyggjum.

Komi til átaka milli þeirra í fangelsum, þurfa fangaverðirnir óhjákvæmilega að skerast í leikinn, þótt átökin beinist ekki í upphafi gegn þeim, og svo vofir yfir að gengin fari að beita þá þrýstingi til að færa þeim fíkniefni og annað inn í fangelsin, eða flytja eitthvað út úr þeim fyrir þá.

Einar Andrésson formaður Fangavarðafélagsins segir að starfsbræður þeirra á hinum Norðurlöndunum séu búnir að vara þá sterklega við þessari þróun, sem nú virðist komin á fullan skrið hér á landi. Gengin hóti fangavörðunum ýmist beint, eða þá fjölskyldum þeirra. Hann segir bagalegt að ekki séu til fleiri fangelsi, eða aðgreindar álmur hér á landi til að geta dreift þessum mönnum sem mest, eins og reynt er að gera ytra, og nú sé komið að því fyrir alvöru, að huga nánar að öryggi fangavarða.