Lífsýni gegna lykilhlutverki í rannsókn sakamála

„Fleiri og fleiri sakamál leysast eingöngu á lífsýnum," sagði Björgvin Sigurðsson, sérfræðingur hjá tæknideild lögreglunnar, í útvarpsþættinum Reykjavík síðdegis á Bylgjunni í dag.

Björgvin sagði að það væri ekki sérstök deild innan lögreglunnar sem annist gömul sakamál. „En þessi gömlu mál koma upp öðru hverju," sagði Björgvin. „Fingraför eru til dæmis tekin af mönnum sem ekki hafa áður verið í kerfinu. Það gerist stöku sinnum að viðkomandi er í kjölfarið bendlaður við eldra mál."

Hann sagði að sú tækni sem gerir greiningu á kjarnsýru (DNA) mögulega sé tiltölulega ný af nálinni. „Það er síðan annað mál hvort að lífsýni séu til staðar á vettvangi glæpsins."

„Lífsýni eru gríðarlega mikilvæg í sakamálum í dag," sagði Björgvin. „Það eru fleiri og fleiri mál sem leysast eingöngu á lífsýnum. Þau eru lykilatriði - þá sérstaklega þegar kemur að kynferðisbrotum.

Björgvin sagði að lífsýnabanki hafi verið stofnaður og að nú unnið að því að stækka hann. „Samkvæmt lögum megum við taka sýni úr þeim sem dæmdir eru í ákveðnum málaflokkum, til dæmis ofbeldisbrot, manndráp og kynferðisbrot.

Hægt er að hlusta á viðtalið í heild sinni hér fyrir ofan.