Komu allir að alvarlegum líkamsárásum vegna handrukkuna

Sex karlmenn voru úrskurðaðir í dag í vikulangt gæsluvarðhald vegna umfangsmikilar rannsóknar lögreglunnar á skipulagðri brotastarfsemi. Mennirnir koma að alvarlegum líkamsárásum vegna handrukkuna en eitt fórnarlambanna var fótbrotið á báðum fótum.

Það var strax á níunda tímanum í morgun sem að komið var með fjóra af mönnunum í Héraðsdóm Reykjaness þar sem krafist var gæsluvarðhalds yfir þeim. Tveir þeirra þeir Annþór Karlsson og Börkur Birgisson sem báðir hafa hlotið þunga dóma fyrir ofbeldismál huldu andlit sín og líkama með flísteppum. Þá er yngsti maðurinn í hópnum aðeins nítján ára. Síðdegis var svo komið með tvo menn til viðbótar og þeir einnig úrskurðaðir í gæsluvarðhald fram á næsta miðvikudag.

Mennirnir voru allir handteknir í gær í tengslum við umfangsmiklar rannsókn lögreglunnar á skipulagðri brotastarfsemi. Framkvæmdar voru átta húsleitir, bæði á heimilum og í fyrirtækjum. Við húsleitirnar var lagt hald á það sem talið er vera þýfi og fíkniefni. Lögregla segir rannsóknina snúa að líkamsmeiðingum, hótunum, innbrotum og þjófnuðum.

Samkvæmt heimildu fréttastofu hafa mennirnir komið að alvarlegum líkamsárásum vegna handrukkana. Ein þeirra átti sér stað snemma árs og voru báðir fætur fórnarlambs brotnir. Þá er málið að hluta til talið tengjast uppgjöri í undirheimum.

Allir mennirnir nema einn hafa kært gæsluvarðahaldsúrskurðinum til Hæstaréttar.