Hægt að afnema höftin á þremur mánuðum

Gjaldeyrishöftin á að afnema á þremur mánuðum, eða eins fljótt og unnt er, þar sem kostnaður vegna þeirra eykst dag frá degi. Þetta sagði Jón Daníelsson prófessor á Iðnþingi í dag.

Þau tímamót urðu hjá Samtökum iðnaðarins að kona var í fyrsta sinn kjörin formaður, Svana Helen Björnsdóttir, stofnandi hugbúnaðarfyrirtækisins Stika, en hún sigraði Harald Ólafsson, framkvæmdastjóra Furu, með 59 prósentum atkvæða.

Gjaldeyrishöftin og staða krónunnar voru hins vegar í brennidepli en Jón Daníelsson, prófessor við London School of Economics, sagði fjóra möguleika í stöðunni, sem hann lýsir nánar í viðtali í fréttum Stöðvar 2. Val Jóns er skýrt: Burt með höftin á þremur mánuðum. Einnig er fjallað um erindi Jóns á vef Samtaka iðnaðarins.