Stálu fimm stórum tölvuskjám úr verslun í nótt

Þjófur, eða þjófar stálu fimm 27 tommu tölvuskjám úr verslun við Síðumúla á þriðja tímanum í nótt og komust undan.

Þeir brutu rúðu til að komast inn og voru aðeins þrjár mínútur á vettvangi, samkvæmt mælingum öryggisfyrirtækis. Lögregla telur því víst að fleiri en einn hafi verið þar á ferð. Þjófanna er nú leitað.

Rúða var líka brotin í myndavélaverslun við Langholtsveg í nótt, en styggð hefur komið að þjófnum og hafði hann ekkert á brott með sér.

Þá var brotist inn í bakarí Í Hamraborg í Kópavogi og í veitingastað í Breiðholti, en ekki er vitað hvort eða hverju var stolið þaðan.