Buster fann 600 grömm af grasi

Lögreglumenn á Selfossi lögðu hald á 600 grömm af kannabis í húsleit á Selfossi á miðvikudag. Í tilkynningu frá lögreglu segir að grunur hafi verið uppi um að í húsinu væri stunduð kannabisræktun. Því var fíkniefnahundurinn Buster sendur á vettvang og gaf hann vísbendingu um að í húsinu væru fíkniefni.

Þegar lögreglu bar að garði var húsráðandi ekki heima en hann var handtekinn á vinnustað sínum. Hann viðurkenndi strax að vera með efni í íbúð sinni og sagðist hafa ræktað þau síðustu mánuði en væri búinn að taka niður plönturnar og að kannabisið væri tilbúið til neyslu.

Við yfirheyrslu gaf maðurinn þá skýringu að hann hefði verið í fjárhagsvandræðum og hafi ætlað að bæta úr þeim með því að selja efnið. Málið er að fullu upplýst og verður sent ákæruvaldi til framhaldsmeðferðar. Áætla má að götuverð efnanna sem voru haldlögð sé rúmar tvær milljónir króna.

Það sem af er þessu ári hefur lögreglan á Selfossi upplýst fimm stórfelld fíkniefnamál sem af er þessu ári á móti tveimur allt síðastliðið ár.