Leðurblökumaðurinn berst gegn glæpum í Brasilíu

Leðurblökumaðurinn aðstoðar nú lögregluyfirvöld í borginni Taubate í Brasilíu. Glæpir eru alvarlegt vandamál í borginni og vonast lögreglan til að ofurhetjan geti beint ungmennum á rétta braut.

Síðustu daga hefur hetjan ferðast milli grunnskóla í borginni og rætt við nemendur. Hann talar fyrir hönd lögreglunnar og bendir ungmennunum á hættur undirheimanna.

Maðurinn á bak við grímuna er hinn fimmtugi Andre Luiz Pinheiro. Hann er fyrrverandi lögreglumaður og er mikill aðdáandi Leðurblökumannsins.

Pinheiro gengur þó ekki jafn langt og hliðstæða sín í teiknimyndasögunum. Hann telur þó baráttuna vera jafn mikilvæga.

„Ég mun ekki beinlínis berjast gegn glæpum," sagði Pinheiro. „En það er lífsnauðsynlegt að fyrirbyggja glæpi og það getum við gert með því að ræða við börnin."

„Þetta er mitt starf, þetta er mín barátta," sagði Pinheiro.

Warley Takeo, lögreglustjóri í Taubate, sagði að Leðurblökumaðurinn gæti auðveldlega myndað tengsl við börnin. „Leðurblökumaðurinn berst gegn glæpum, rétt eins og lögreglan," sagði Takeo. „Því ákváðum við að leita til hans."