Bretland lokar sendiráði sínu í Sýrlandi

Bretland hefur ákveðið að loka sendiráði sínu í borginni Damaskus í Sýrlandi. Samkvæmt William Hague, Utanríkisráðherra Bretlands, var ekki lengur hægt að tryggja öryggi starfsmanna sendiráðsins og voru þeir því fluttur úr landi.

Hann biðlar nú til breskra ríkisborgara í Sýrlandi um að yfirgefa landið.

Átök hafa farið versnandi í landinu síðustu daga - þá aðallega í borginni Homs en þar ríkir umsátursástand.

Öryggisráð Sameinuðu Þjóðanna samþykkti í dag ályktun þar sem hernaðaraðgerðir sýrlenskra yfirvalda gegn andspyrnuhópum eru fordæmdar.

Þetta er í annað sinn sem ráðið samþykkir ályktun varðandi ástandið í landinu og líkt og áður ákváðu fulltrúar Rússlands og Kína að styðja ekki ályktunina.

Samkvæmt Mannréttindaráði Sameinuðu Þjóðanna hafa rúmlega 7.500 manns látist í Sýrlandi frá því átökin hófust fyrir 11 mánuðum.