"Hernaðaraðgerðir gegn Íran eru raunhæfur valkostur"

Barack Obama, Bandaríkjaforseti, sagði í dag að hernaðaraðgerðir gegn Íran af hálfu Bandaríkjanna séu raunhæfur valkostur. Obama mun funda með Benjamin Netanyahu, forsætisráðherra Ísrael á morgun og munu þeir ræða um ástandið í Íran.

Obama lét ummælin falla á ráðstefnu AIPAC (e.American Israel Public Affairs Committee) í dag. Hann sagðist vera reiðubúinn að beita ítrustu aðgerðum til að koma í veg fyrir að Íran þrói kjarnorkuvopn.

„Ég hef sagt það áður og segi það á ný. Ég mun beita öllum úrræðum til að koma í veg fyrir að Íranir þrói kjarnavopn," sagði Obama.

Bandaríkjaforseti varaði þó við stríðsáróði og sagði að slík orðræða sé einungis til þess fallin að hefta samningaferli.

Með ummælunum vonast Obama til að styrkja stöðu sína fyrir forsetakosningar 6. nóvember næstkomandi. Obama hefur verið harðlega gagnrýndur fyrir linkind gagnvart Íran.

Miklar deilur hafa sprottið upp á síðustu mánuðum vegna kjarnorkuáætlunar Írana. Yfirvöld í Tehran, höfuðborg Írans, þvertaka fyrir að þróun kjarnavopna sé tilgangur áætlunarinnar.

Töluverð spenna er á svæðinu og eru hækkanir á heimsmarkaðsverði olíu sagðar tengjast málinu.

Úrlausn á málinu er afar mikilvæg fyrir Obama því endurkjör hans byggir á mörgu leyti á úrbótum á efnahagskreppu Bandaríkjanna og er farsæll endir á deilunum við Íran nauðsynlegur liður í því.