Svifdrekamaður barðist við hákarla í tvo daga

Pólskur svifdrekamaður barðist fyrir lífi sínu í tvo daga eftir að hann hrapaði yfir Rauðahafi. Hann háði grimma viðureign við hákarla sem sóttu að honum.

Hinn 42 ára gamli Jan Lisewski hrapaði þegar hann reyndi að fljúga milli Egyptalands og Sádí-Arabíu. Hann átti aðeins þriðjung eftir af leiðinni þegar vindinum lægði og hann hrapaði í Rauðhafið.

Það var tekið að dimma þegar Lisewski sendi neyðarskilaboð í gegnum GPS-staðsetningartæki. Það tók björgunarmenn þó 40 klukkustundir að hafa upp á honum.

Lisewski pakkaði svifdrekanum saman og bjó til fleka - hann hugðist leggja sig þangað til að honum yrði bjargað.

En hann áttaði sig fljótt á að hann var ekki einsamall. Ellefu hákarlar hringuðu flekann. Næstu klukkustundirnar barðist Lisewski við hákarlana. Að sögn Lisewski voru hákarlarnir rúmir fimm metrar að lengd.

„Ég var með lítið prik. Ég stakk þá í augun, trýnið og tálknin," sagði Lisewski. Honum var á endanum bjargað og var vel á sig kominn að sögn björgunarmanna.

„Áður en ég lagði af stað sagði bróðir minn mér að taka hníf meðferðis," sagði Lisewski. „Hann hefur líklega fengið fyrirboða."