Reyna að lokka lækna til Þórshafnar

„Auðugar veiðilendur á sjó, landi og í ám og vötnum eru í næsta nágrenni, auk þess sem góð sundlaug, gott íþróttahús, líkamsræktarstöð og útivistarsvæði við húsvegginn," segir meðal annars um starfshlunnindi, í atvinnuauglýsingu á Starfatorgi Stjórnarráðsins.

Auk þess er tekið fram að ríflegur frítekjuréttur fylgi starfinu. Við fyrstu sýn mætti ætla að verið væri að auglýsa eftir einhverskonar veiðieftirlitsmanni, minnkabana, félagsmálastarfsmanni eða íþrótatþjálfara.

Það er þó víðs fjarri því auglýsingin er frá Heilbrigðisstofnun Þingeyinga, sem bráðvantar heimilislækni á Þórshöfn á Langanesi.

Þessi auglýsing er þó í alvöru til marks um hversu erfitt er að manna sumar læknastöður í strjálbýlinu. Það verður að tína til alla tilfallandi kosti við starfið.

En gárungarnir eru þó strax farnir að velta fyrir sér hvernig næsta auglýsing verður, ef engin fellur fyrir þessari. Verður næsta þá eftilvill einhvernveginn svona: „Vín og villtar meyjar á hverju strái, og ríflegur frítökuréttur daginn eftir."