Kofi Annan væntanlegur til Sýrlands

Andspyrnuhópar í Sýrlandi eru afar óánægðir með hugmyndir Kofi Annans, sendiherra Arababandalagsins í Sýrlandi, varðandi pólitíska lausn á átökunum í landinu.

Leiðtogi andspyrnumanna sagði að ummælin væru óásættanleg í ljósi þess að sýrlenskir borgarar séu myrtir á hverjum degi í landinu.

Annan er væntanlegur til Sýrlands á morgun. Hann sagði í dag að diplómatísk lausn milli yfirvalda í Sýrlandi og andspyrnuhópa sé eina leiðin til að stilla til friðar í landinu.

Enn fremur sagði Annan að aukning hermanna á götum Sýrlands muni aðeins leiða til fleiri dauðsfalla.

Valerie Amos, yfirmaður mannúðarmála og hjálparstarfs Sameinuðu Þjóðanna, sagði í dag að yfirvöld í Sýrlandi íhugi nú að hleypa eftirlitsmönnum inn í í landið.

Hún vonast til þess að eftirlitsmennirnir geti lagt mat á ástandið í landinu.

En þrátt fyrir viðræður diplómata um ástandið í Sýrlandi héldu mótmælin áfram í dag. Fregnir herma að tugir þúsunda andspyrnumanna hafi mótmælt í borgunum Idlib og Damaskus.

Að minnsta kosti 35 létust í mótmælunum.