Gáttuð á baðvenjum Íslendinga

Skilti sem Íslendingar hafa þekkt svo árum skipti af sundstöðum borgarinnar er farið að vekja athygli erlendis. Á skiltinu eru sundgestir beðnir um að baða sig vandlega án sundfata. Iva Rose Skoch, pistlahöfundur á vefnum Global Post, vekur athygli á málinu og segist hafa átt samtal um þetta við íslenskan félaga sinn.

Sá íslenski spurði hví í ósköpunum Bandaríkjamenn vildu alltaf baða sig í sundfötum. Iva svaraði því til að Bandaríkjamenn væru hófsamir og sjálfmeðvitaðir þegar kemur að nekt. „Mörg bandarísk börn hafa vaxið úr grasi án þess að hafa séð foreldra sína ganga um nakta, hvað þá heldur ókunnugt fólk. Og alls ekki á almenningsstöðum. Í Bandaríkjunum er varla nokkur nektarströnd og þeir sýna ekki einu sinni brjóst í sjónvarpinu," segir Iva.

Iva segir í pistilnum að Íslendingar þrífi sig gríðarlega vel á sundstöðum. Aðrir myndu varla þrífa sig svona vel nema ef þeir væru að fara á mjög spennandi stefnumót. Hún segir að ef fólk hyggur á ferð til Íslands ætti það að vera viðbúið þessari hefð.