Vill samstarf allra flokka í bæjarstjórn

Hjálmar Hjálmarsson, oddviti Næst Besta Flokksins í Kópavogi, býst ekki við því að meirihluti Sjálfstæðisflokks, Framsóknarflokks og Lista Kópavogsbúa sé starfhæfur. Ómögulegt sé að mynda starfhæfan meirihluta.

Hjálmar hvetur alla hlutaðeigandi, í yfirlýsingu sem hann sendi fréttastofu Stöðvar 2 og Vísis, að kynna sér hugmynd Næst Besta Flokksins um samstarf allra flokka í bæjarstjórn. „Þar er gert ráð fyrir að framboðin skipti með sér verkum og deili ábyrgð á nefndarstjórnum og öðrum trúnaðarstörfum. Þá verði meirihlutafundir lagðir niður en í staðinn teknir upp vinnufundir oddvita allra flokka," segir Hjálmar. Hjálmar segir að þessi vinnubrögð sem hann boði séu alls ekki ný af nálinni. Til dæmis hafi allir flokkar unnið saman að fjárhagsáætlun Kópavogsbæjar þrjú ár í röð.

Hjálmar segist ætla að standa við allar þær ákvarðanir sem hann hafi stutt hingað til. Nýlega hafi verið samþykkt af 7 bæjarfulltrúum fjárhagsáætlun fyrir árið 2012. Eftir henni muni hann vinna í grundvallaratriðum.





Orðrétt segir Hjálmar þetta:

Ég mun sem bæjarfulltrúi standa við allar þær ákvarðanir sem ég hef stutt hingað til.

Nýlega var samþykkt af 7 bæjarfulltrúum fjárhagsáætlun fyrir árið 2012. Eftir henni mun ég vinna í grundvallaratriðum og reikna með því að hinir 6 bæjarfulltrúarnir sem greiddu henni atkvæði muni gera það einnig.

Málefnasamningur gamla meirihlutans verður sá rammi sem ég mun vinna eftir sem og hingað til.

Ég mun tala áfram fyrir þeim málefnum sem þar koma fram.

Starfsemi hinna fjölmörgu stofnana Kópavogsbæjar gengur vel að því ég best þekki til. Leikskólar, grunnskólar, félagsþjónustan, rekstur sundlauga og íþróttamannvirkja, menningarstofnanir o.s.frv. allt er á góðu róli.

Störf nefnda og ráða ganga prýðilega og hafa gert allt kjörtímabilið. Sjaldan kemur upp stór ágreiningur í nefndum og ráðum bæjarins en þar sitja fulltrúar kosnir af bæjarstjórninni frá öllum framboðum.

Starfsmenn bæjarins halda sínu striki og vinna eftir fárhagsáætlun og takast á við þau verkefni sem upp koma af sömu kostgæfni og þeir hafa hingað til gert.

Bæjarráð er enn að störfum og afgreiðir þau mál sem inn á þess borð kemur. Í raun er ekkert að í starfsemi og rekstri bæjarins sem vert er að hafa stórar áhyggjur af.

Það er aðeins í efsta laginu, hjá hinum kjörnu fulltrúum, innan flokkana, sem ruglið, bullið og vitleysan hefur tekið völdin.

Þessi staða er á okkar ábyrgð og það er okkar að leysa úr.

Ég hvet alla bæjarfulltrúa, varafulltrúa, nefndarfólk og aðra sem starfa að þessum málum að kynna sér hugmynd NæstBestaFlokksins um samstarf allra flokka í bæjarstjórn. Þar er gert ráð fyrir að framboðin skipti með sér verkum og deili ábyrgð á nefndarstjórnum og öðrum trúnaðarstörfum. Þá verði meirihlutafundir lagðir niður en í staðinn teknir upp vinnufundir oddvita allra flokka.  - Þessi vinnubrögð eru alls ekki ný af nálinni og vil ég minna á að allir flokkar unnu saman að fjárhagsáætlun Kópavogsbæjar þrjú ár í röð.

Ég var kjörinn til þess að sitja í 11 manna bæjarstjórn og gegna þeim trúnaðarstörfum sem mér var falið af þeirri stjórn. Ég hef enga kosti aðra en vinna áfram með öllu þessu fólki út kjörtímabilið að því sameiginlega markmiði okkar allra, að vinna Kópavogsbæ eitthvert gagn.