Spáð enn einum snjókomubakkanum

Spáð er enn einum snjókomubakkanum úr suðri yfir Suður- og Suðvesturland með kvöldinu samkvæmt upplýsingum frá veðurstofu Íslands.

Þannig snjóar í hægum vindi í um 2 til 3 klukkustundir og einnig vestanlands og á Norðurlandi síðar í kvöld og nótt.

Stórhríð verður á norðanverðum Vestfjörðum frá því snemma í fyrramálið. Syðst á landinu og með suðausturströndinni verður hins vegar slydda sem frýs og myndar varasama ísingu síðar í nótt.

Það er hálka og éljagangur á Hellisheiði og í Þrengslum en Mosfellsheiði er þungfær samkvæmt upplýsingum frá Vegagerðinni.

Á Suðurlandi er víða þæfingur eða jafnvel þungfært í uppsveitum en annars staðar er snjóþekja eða hálka.

Hálkublettir eru á Reykjanesbraut. Þæfingsfærð er á Krýsuvíkurvegi og Suðurstrandarvegi.

Hálka er á flestum vegum á Vesturlandi. Þungfært er á Útnesvegi en ófært í Álftafirði.

Á Vestfjörðum er þæfingsfærð úr Kollafirði í Þorskafjörð. Hálka og snjóþekja á öðrum leiðum.

Á Norðurlandi vestra er hálka. Þæfingsfærð er fyrir Vatnsnes.

Norðausturlandi er hálka, snjóþekja, skafrenningur og mjög víða éljagangur. Þæfingur og skafrenningur er á Hófaskarðsleið og ekki verður hreinsað þar meira í kvöld og má því gera ráð fyrir að það verði þungfært eða ófært með kvöldinu. Ófært er á Hálsum og Hófaskarði. Þæfingur og stórhríð er á Brekknaheiði.

Á Austurlandi er snjóþekja, hálka og mjög víða er snjókoma. Á Vatnsskarði eystra er óveður og þar er ófært. Þæfingsfærð er á Fjarðarheiði og ofankoma. Á Suðausturlandi er hálka.