Mæðgur frá Brisbane sáu norðurljósin en ekki Lárus Welding

„Við erum bara ævintýragjarnar konur," sagði Margret Murphy sem, ásamt dóttur sinni, sátu í þingfestingu dómsmáls gegn Lárusi Welding, fyrrverandi forstjóri Glitnis, og Guðmundi Hjaltasyni, fyrrverandi framkvæmdastjóri fyrirtækjasviðs Glitnis. Hvorugir mættu í þingfestingu Svartháfsmálsins svokallaða í Héraðsdómi Reykjavíkur í dag því báðir voru þeir staddir erlendis.

Margret og dóttir hennar Emily voru hinsvegar komnar allar leið frá Ástralíu til þess að skoða land og þjóð. Og sátu fyrir tilviljun í réttarhöldunum eftir að þær hittu fréttamann sem útskýrði fyrir þeim mikilvægi dómsmálsins.

Báðar könnuðust þær við bankahrunið á Íslandi og fannst tilvalið að fá að sitja réttarhöldin í þessu merkilega máli, sem eru fyrstu réttarhöldin þar sem stjórnendur stóru viðskiptabankanna eru dregnir fyrir dóm.

Þær komu til landsins í gær og hófu ferðalag sitt á hefðbundnari ferðamannastöðum, það er að segja í Bláa lóninu.

Nú er sumar í Ástralíu og aðspurðar hvernig þeim litist á veðrið, svaraði Margret: „Það er frábært. Fólkið líka."

Eftir samtalið við blaðamann ætluðu mæðgurnar að skoða Ráðhús Reykjavíkur. Síðan verður stefnan tekin á landsbyggðina.

Þær sögðu það skemmtilega reynslu að sitja í réttarhöldunum þó svo þær hafi ekki skilið neitt sem þar fór fram. „En þetta var frábær reynsla," sögðu þær.

Og þó þær hafi ekki séð meinta fjárglæframenn í dag þá sögðust þær hafa verið svo heppnar að sjá norðurljósin í gær. Og þeim líkaði vel.

„Og við viljum bara bera Íslendingum hlýjar kveðjur," sögðu mæðgurnar glaðbeittar að lokum.