Brenndist alvarlega á sjóðandi vatni

Karlmaður brenndist alvarlega á efri hluta líkama síns þegar sjóðandi vatn heltist yfir hann. Atvikið átti sér stað aðfaranótt sunnudags í orlofshúsi í Grímsnesi. Maðurinn var þar ásamt fleira fólki.

Fólkið ætlaði leggjast í setlaug sem var á sólpalli við húsið. Ekki var nægjanlega heitt vatn í setlauginni og var þá brugðið á það ráð að hita vatn í fimm lítra potti á eldavél. Búið var að fara með nokkra potta í setlaugina þegar það óhapp varð að maðurinn var á leið að setlauginni með sjóðandi vatn í pottinum að hann datt og fékk sjóðandi vatnið yfir sig. Talið er að hann hafi runnið til á hálku sem var á pallinum með þessum afleiðingum.

Sjúkraflutningamenn voru kallaðir á staðinn og fluttu þeir manninn á Slysadeild Landspítala í Fossvogi þar sem hann var lagður inn á gjörgæsludeild. Maðurinn hlaut 2. stigs brunasár en er með meðvitund og ástand hans metið stöðugt.