Þrettándanum fagnað með brennum

Í dag er þrettándinn, síðasti dagur jóla og af því tilefni eru brennur fyrirhugaðar víða um land. Í Reykjavík verða þrjár brennur og fjölbreytt dagskrá í boði. Brennurnar verða í Grafarholti, Grafarvogi og í Vesturbæ. Eftirfarandi upplýsingar er að finna á heimasíðu borgarinnar:



Þrettándabrenna í Grafarholti

Í Leirdal, við grasæfingasvæði Fram við enda Þorláksgeisla.

Dagskrá verður sem hér segir:

19:30 Blysför frá Guðríðarkirkju með fánabera frá Árbúum, álfa og ynjur úr æskulýðsstarfi Guðríðarkirkju, unga álfaprinsa og prinsessur úr Fókus og skólahljómsveit Grafarvogs og Grafarholts í broddi fylkingar. Seldir verða kyndlar við anddyri kirkjunnar.

20:00 Söngskemmtun í Leirdal, skólahljómsveit Grafarvogs og Grafarholts spilar, brennukóngur tendrar í þrettándabrennunni, spilað og sungið fyrir í þrettándasöng, jólasveinar koma í heimsókn og glæsileg flugeldasýning Fram.

Þrettándagleði í Grafarvogi

Föstudaginn 6. janúar verður hin árlega Þrettándagleði Grafarvogsbúa haldin við Gufunesbæinn. Gleðin hefst kl. 17:00 með kakó- og kyndlasölu við Hlöðuna þar sem skólahljómsveit Grafarvogs leikur létt lög. Blysför að brennunni og kveikt í kl. 17:45. Við tekur skemmtun og söngur á sviði. Gleðin endar á skot kökusýningu í boði Íslenska gámafélagsins Allir velkomnir!

Þrettándahátíð í Vesturbæ

Þrettándahátíð Vesturbæjar verður sem fyrri ár haldin með pompi og prakt. Venju samkvæmt verður safnast saman við Frostaskjól, á svæði KR, Frístundamiðstöðvarinnar Frostaskjóls og Do Re Mí. Barna- og stúlknakór Neskirkju taka á móti gestum með ljúfum söng og KR flugeldar verða með kyndla til sölu.

Formaður hverfisráðs Vesturbæjar mun svo senda skrúðgöngu af stað með stuttu ávarpi og munu Ægisbúar leiða viðburðaríka gönguna ásamt lúðrablásurum að brennustæðinu á Ægisíðu. Brennan verður tendruð um kl. 18:30.

Kakó og kleinur verða gefnar á meðan byrgðir endast, fjöldasöngur verður og Guðmundur Steingrímsson þenur nikkuna. Um klukkan 18:50 sjá KR flugeldar svo um að lýsa upp himininn með flugeldasýningu að hætti hússins!