Bróðir fjöldamorðingjans með sprengiefni í bíl sínum

Abdelkader Merah, eldri bróðir fjöldamorðingjans Mohamed Merah, sem myrti sjö manns á síðustu vikum í Toulouse í Frakklandi, er í haldi lögreglu ásamt kærustu sinni. Móður þeirra hefur verið sleppt en fjölskyldan var handtekin stuttu eftir að Merah játaði að hafa framið voðaverkin.

Lögreglan rannsakar nú hvort að bróðirinn og kærastan hans hafi aðstoðað Mohamed við morðin. Þau hafa verið flutt í fangaklefa í höfuðstöðvum frönsku leyniþjónustunnar í París. Sprengiefni fundust í bifreið í eigu Abdelkader. Hvort að gefin verði ákæra út á hendur þeim, á eftir að koma í ljós.

Mohamed Merah, myrti sjö manns í borginni Toulouse á síðustu vikum, þar af þrjú börn við gyðingaskóla. Hann var skotinn til bana á heimili sínu af lögreglumönnum á fimmtudagsmorgun, en lögreglan hafði setið um heimili hans í um 30 klukkustundir.