Veigar Páll mættur í fallbaráttuna með Stabæk

Veigar Páll Gunnarsson var í dag kynntur með formlegum hætti sem leikmaður norska úrvalsdeildarliðsins Stabæk. Veigar gerði starfslokasamning við Vålerenga en þar lék hann aðeins 23 leiki og skoraði 3 mörk. Veigar þekkir vel til hjá Stabæk en þar skoraði hann 79 mörk í 175 leikjum.

Stabæk er sem stendur í neðsta sæti norsku úrvalsdeildarinnar en liðið hefur glímt við erfiða fjárhagsstöðu á undanförnum misserum. „Ég vonast til þess að geta hjálpa liðinu, og mér hefur alltaf liðið vel hjá Stabæk," sagði Veigar við fjölmiðlamenn í dag. „Hlutirnir gengu ekki upp hjá mér hjá Vålerenga," sagði Veigar en hann átti eftir 1 ½ ár af samningi sínum við Vålerenga sem keypti hann frá Stabæk í umdeildri sölu sem er til rannsóknar hjá norsku lögreglunni.

Staða Stabæk í deildinni er ekki góð. Liðið er með 10 stig efti 19 leiki, og er 7 stigum á eftir Sandnes Ulf sem er í þriðja neðsta sæti með 17 stig. Fredrikstad er í næst neðsta sæti með 15 stig.