Stjórnlagaráð klárar störf sín í kvöld

Stjórnlagaráðsfulltrúar hafa fundað stíft síðustu fjóra daga til að fara yfir ábendingar Alþingis. Ráðið skilar af sér í kvöld og nú er boltinn aftur hjá þinginu, segir Eiríkur Bergmann fulltrúi í stjórnlagaráði.

Fulltrúarnir hafa unnið hörðum höndum í húsakynnum Háskóla Íslands við Stakkahlíð. „ Til þess að betrumbæta það plagg sem við samþykktum í sumar," segir Eiríkur.

Ráðið hefur sniðið inn valkosti við umdeild ákvæði og fulltrúar þess hugsa sér að kjósendur geti jafnvel fengið að velja á milli þeirra í þjóðaratkvæðagreiðslu um nýju stjórnarskrána. Eiríkur tekur málskotsréttinn þar sem dæmi en ef Alþingi kýs að afgreiða málið með þeim hætti sem ráðið hefur í huga gætu kjósendur fengið að velja þar á milli þriggja valkosta.

„Hvort að málskot í þjóðaratkvæðagreiðslum eigi að vera í höndum hlutfalls kjósenda, minnihluta þings eða áfram einungis hjá forseta Íslands eða hjá tveimur eða þremur af þessum aðilum," segir Eiríkur.

„Eflaust yrði það þannig að menn gætu eftir sem áður samþykkt eða hafnað plagginu en þeir sem vilja hafa áhrif á fleiri þætti gætu þá haft þann kost og það myndi auðvitað ekki flækja það fyrir hinum þannig að það ætti að vera tiltölulega einfalt," útskýrir Eiríkur.

Ráðið skilar af sér vinnunni á morgun og þá er það í höndum þingsins að útbúa þingsályktunartillögu fyrir þjóðaratkvæðagreiðsluna sem þingið hefur samþykkt að fari fram samhliða forsetakosningunum í sumar.